Ressing
Hihimlay akong haplos ng mga talulot ng tanduyong
Pinagtiyagaan nating himayin nang buong magdamag
At yakap ng iyong mga titig, habang hinihimay ang mga salita.
Idinuduyan ako ng iyong malamyos na tinig,
Nagpapainit sa gabing malamig tulad ngayon,
Pinuyat natin ang gabi, para sa bukang-liwayway.
Hahagkan ako ng malagkit na inangit
Pinakahalu-halo nating maigi sa pulot,
Upang ikumot, ang bawat salita, bawat kuwentong
Bumigkis nang pagkahigpit
Sa bawat palito ng binhing hinimay,
Pinutulan ng dahon, Inalisan ng maitim na mantsa;
Sinuklayan ng tuyong dahon.
Sa wakas, na-ressing nang lahat ang binhi.
Handa na ang latag para sa ating dalawa.
Napatubigan na rin ang pinitak.
Matulis na ang asad. Kaya’t halika, halika na,
Makikipagtalad tayong muli
Sa lupa, sa pagtatanim ng sibuyas, at
Pagsilang ng bagong araw.
~ Disyembre 1994
Bokabularyo:
Ressing: paghihimay ng binhi (paghahanda para sa pagtatanim) ng tanduyong, karaniwang ginagawa nang buong magdamag, kasi malalanta ang binhi kapag pinagtagal pa bago maitanim.
Tanduyong: variety ng sibuyas, more popularly known as sibuyas tagalog (yung sariwang dahon nito ang ginagayat at isinasahog sa goto).
Inangit: malagkit na isinaing sa gata ng niyog at nilagyan lang ng asin)
Palito: bawat stick ng binhi ng tanduyong
Latag: pagtatamnan ng tanduyong ~ palayang pinaggapasan na pinatuyo at nilatagan muna ng dayami
Pinitak: parsela ng bukirin o palayan
Asad: ginagamit para lagyan ng butas ang lupa sa latag kung saan isu-shoot ang palito ng binhi
Dagdag pang mga tala: Sa Hilagang Nueva Ecija (halong Tagalog, halong Iluko), kapag ang binata ay nagpasya nang mamuhunan sa pagtatanim ng sibuyas, ibig sabihin, mag-aasawa na ito pagdating ng anihan. Karaniwang nakukumpirma ng madla ang relasyon ng binata at dalaga sa paghahanda ng binhi.
August 5th, 2007 at 4:56 am
red,
rich imagery.
plu
August 5th, 2007 at 6:43 am
malalim masyado ang iyong tagalog, hindi ko kayang arukin!
Sa madaling salita, it’s do deep! Grabe!